Hedvig Charlotta Nordenflycht

Hedvig Charlotta Nordenflycht (* 28. Novemba 1718 z Stockholm; † 29. Juni 1763 Lugnet ba Schloss Skokloster) wor a bedeitende schwedische Dichdarin, Feministin und Salon-Madame.

Ia Voda wor da Beamte Anders Andersson Nordbohm, wo ois Nordenflycht godlt worn is, ia Muada de Christina Rosin. Wei da Untarichtgegnstand vo Deandln za dea Zeid oba vor oim Hausorbat wor, hod se vui glesn und si vor oim in Theologie, Philosophie, Latein und Germanistik sejm weidabuidd.

Anno 1753 is se in de literarische Akademie Tankebyggarorden ("Ordn vo de Gedanknweaka") gwejd worn. Se is a fiarends Mitglied vo da Akademie worn und hod do de Roin vo da Salon-Madame gspuit. Ia Akademie-Nama wor Uranie.

Es wead teiweis ognumm, dass de Nordenflycht an de Foign vo an Freidoudvasuach gstorm is, wo vo iare Freind obgstrittn worn is.^[1] De Nordenflycht wor jednfois a recht melancholische Dichdarin, hod iban Freidoud gschriebm und is kuaz noch Bekanntwean vo iare letztn tragischn Valiabtheid in en 20 Joar jingan Dichda Johan Fischerström gstorm. Dea Liab hod se 1762 es Gedicht Över en hyacint ("Iba a Hyazinthn") gwidmet.

De Nordenflycht wor oane vo de easchtn 6 Fraun, wo in de Nationale Schwedische Portrait-Galerie af Schloss Gripsholm afgnumma worn is; zamma mit da Brigitta vo Schweden, da Vendela Skytte, da Barbro Stigsdotter (Svinhufvud), da Sophia Rosenhane und da Sophia Elisabet Brenner.

1. ↑ Författaren Hedvig Charlotta Nordenflycht (Uppsala Universitet)